هل فعلاً في استراتيجية تسويق تنفع كل الشركات!

 هل فعلاً في استراتيجية تسويق تنفع كل الشركات!

ممكن يا جماعة افتح معاكم النقاش في الموضوع ده؟

أنا كل ما أشوف البوست اللي بيقول إن في "Marketing Strategy" تنفع لكل أنواع الشركات، أستغرب جدًا! يعني إزاي؟ هل ينفع حاجة زي دي؟

طيب خلينا ننتهز الفرصة دي ونسأل:

يعني إيه أصلاً استراتيجية تسويق؟
ببساطة، استراتيجية التسويق هي الخطة اللي بتحدد بيها إزاي تحقق أهدافك التسويقية. بس الفكرة هنا إنها مش حاجة واحدة تنفع الكل، لأنها بتتغير على حسب:

• السوق اللي شغال فيه.
• نوع منتجك أو خدمتك.
• العميل اللي بتستهدفه.
• وحالة شركتك، سواء كنت لسه بتبدأ أو شركة شغالة بقالها فترة.

خلينا ندي مثال عملي:
افترض إنك عايز تدخل سوق التعليم الأونلاين في مصر، وبعد كده تتوسع للوطن العربي.

• هنا تكون حددت السوق المستهدف جغرافيًا (مصر والوطن العربي) ونوع الصناعة (التعليم).
• ممكن تكون عارف كويس شريحتك المستهدفة وشكل المنتج اللي عايز تقدمه لأنك ابن السوق ده. وساعتها هتبدأ على طول في وضع الاستراتيجية.
• أو ممكن تكون لسه بتستكشف، ووقتها هتعمل أبحاث كتير عشان تلاقي فجوة أو مشكلة في السوق، وتبدأ منها.

طب بعد ما تعرف جمهورك ومنتجك، تعمل إيه؟
في النهاية، استراتيجية التسويق لازم تجاوبك على سؤال: إزاي أوصل لعملائي وأحقق النجاح في السوق؟

اهدافي التسويقية دي ممكن تكون:

·         market share  معين في مجال معين

·         حجم مبيعات محدد للمنتج اللي بتعمله ال strategy

·         نسبة زيادة في المبيعات عن السنة اللي قبلها

طيب عشان تحقق الأهداف دي محتاج تعمل ايه؟

محتاج تقول أي هي مواصفات المنتج وسعره كام وهايوصل للعميل ازاي و هاقنع العميل يشتريه ازاي
وده اللي بنسميه "Marketing Mix"، واللي بيتكون من 4 عناصر أساسية (الـ4Ps) زادوا بعد كده لـ7Ps أو حتى أكتر.

1. المنتج (Product):
• منتجك شكله إيه؟
• إيه اللي يميزه عن المنافسين؟
• لو بتعمل منتج برمجي، مثلاً، لازم يكون عندك رؤية واضحة ليه غير مجرد خطة تسويقه.
2. التسعير (Price):
• إيه استراتيجية التسعير اللي هتعتمد عليها؟
• هتضيف هامش ربح على التكلفة؟ ولا هتبدأ بسعر عالي عشان منتجك مبتكر؟ كل سوق وله طريقة!
3. المكان (Place):
• منتجك هيوصل للعملاء إزاي؟
• هتبيع بشكل مباشر، ولا من خلال موزعين، ولا أونلاين؟
4. الترويج (Promotion):
• هتعمل إيه عشان توصل لعملائك؟
• إعلانات؟ سوشيال ميديا؟ ولا تسويق بالمحتوى؟ المهم إنك تختار الوسيلة المناسبة.

 

وبس يا سيدي هي دي بقى الmarketing strategy بتبسيط قد يكون مخل و لكنه الحد الأدنى اللي يفهمك يعني ايه marketing strategy

ودلوقتي بعد ما فهمت يعني ايه marketing strategy، شايف انه ينفع يبقى في marketing strategy   تصلح لكل الشركات؟

مستني آراءكم ولو عندكم أي تساؤل بخصوص ال marketing انا معاك (بس ال marketing الاستراتيجي مش ال digital marketing ده ليه ناسه اللي أفضل مني بكتير فيه)