أنا إيه اللي جابني هنا؟

من اكتر الاخطاء اللي بنقع فيها، هي اننا كتير قوي بننسى الغاية او السبب اللي عشانه بنعمل حاجة معينة او ماشيين في طريق معين، بننسى احنا بنعمل الحاجة اللي بنعملها دي ليه
.
يعني مثلاً انا باتعلم كذا ليه؟ او انا باشتغل في المجال الفلاني ده ليه؟ او حتى هو انا في نزاع او صراع مع فلان ده ليه؟ احياناً بتلاقي نفسك في وسط صراع كبير قوي و الصراع ده اخدك لافعال و مستويات ما كنتش ابداً في دماغك انك توصلها، و لكن دافع الانتقام او الانتصار او السيادة بيدفعك لتصعيد و لافعال هي اكبر من سبب الصراع بكتير قوي
.
و عشان كده مهم جداً انك كل شوية و انت بتجري و بتلاحق الاحداث، تقف شوية و تسأل نفسك هو انا باعمل ده ليه؟ هو انا ماشي في الطريق ده ليه؟ هو انا اصلاً دخلت الطريق ده عشان احقق ايه؟
.
ده هايساعدك كتير تضبط افعالك و اتجاهك
.
يعني مثلاً ماشي في الطريق و حد كسر عليك و حصلت مشادة كلامية و الامر تطور، و شايف انه هايوصل لصراع تكسير عظام، لا اوقف لحظة و اسال نفسك هو انا رايح على فين و كل ده ليه؟ هتلاقي ان السبب تافه، فممكن ساعتها تخمد نار الصراع اللي بكبر ده بانك تعتذرله او تقوله خلاص حصل خير و كلنا بنغلط و تمشي و هكذا
.
و لكن من اكتر الحاجات اللي محتاج كل شوية تقف و تسأل نفسك هو انا باعملها ليه او ايه الهدف او الغاية من وارءها هي الحياة نفسها، أيوة بالظبط، زي ما سمعت، الحياة، لازم كل شوية تسأل نفسك هو انا عايش ليه؟ ليه ربنا خلقني؟ اكيد ليه حكمة من خلقي، طيب انا لازم احقق حكمة ربنا من خلقي، دايماً فكر نفسك انت جاي الدنيا ليه، انت بتشتغل ليه، اتجوزت و خلفت و بتربي عيالك عشان تحقق ايه، مهم جداً انك دائماً تفتكر ان الغاية من خلق سيدنا ادم و من بعده كله البشر بيما فيهم احنا و اللي هاييجوا من بعدنا هو اننا نعبد الله و نعمر الارض، عبادة الله معروفة، و اعمار الارض هي انك تساهم في بناء و تطوير ونفع البشرية من خلال ما تجيده، سواء تعليم او صناعة او ادخال السرور على الناس او جعل حياتهم او صحتهم افضل و هكذا
الطبيب بيعمر الارض من خلال انه بيخلي صحة الناس افضل
المهندس بيعمر الارض من خلال مباني و برامج بتخلي حياة الناس افضل
المدرس بيعمر الارض من خلال انه بيساهم في بناء عقول الاطفال اللي هايكبروا و يعمروا الارض هما كمان
حتى الام اللي هي ست البيت مش بتشتغل، رسالتها في الحياة عظيمة و بتساهم في اعمار الارض من خلال انها بتحسن تربية اطفالها عشان تخرج للمجتمع رجل و زوج و اب ناجح و امرأة و زوجة و ام ناجحة تساهم في اعمار الارض و نفع البشرية
.
اخيراً: لا تنسى الغاية من وجودك في الدنيا: عبادة الله و اعمار الارض، اقف كل شوية و اطمئن ان بوصلتك في الاتجاه الصحيح، عشان على الاقل تظبط النية و تخلي كل افعالك نيتها ارضاء الله و اعمار الارض فتؤجر عن كل ما
تفعل